სახლის მცენარეები ბინაში ცოცხალი ფერებისა და ბუნების შეტანის საუკეთესო საშუალებაა. გარდა ამისა, მცენარეები შესანიშნავი გზაა სახლში ჰაერის გასაწმენდად. ჩვენს ბლოგში წაიკითხავთ რამდენიმე პატარა მცენარის შესახებ და მიიღებთ რჩევებს, თუ როგორ უნდა მოუაროთ მათ.
პატარა მცენარეები სახლისთვის
დიდი და ლამაზი მცენარეები ძალიან მომხიბვლელია, მაგრამ ხშირად, რაც არ უნდა დიდი სახლი გვქონდეს, მათთვის ინტერიერში ადგილის გამონახვა რთულია. სწორედ ამიტომ, წარმოგიდგენთ პატარა 8 მცენარეს, რომელიც ნებისმიერ ინტერიერს მოუხდება.
1. ალოე ვერა - თუ პატარა სახლი გაქვთ, პატარა მცენარეები სწორედ თქვენთვისაა. ერთ-ერთი გამორჩეულია ალოე, რომელსაც ძალიან უყვარს მზე და მორწყვიდან მორწყვამდე აუცილებლად მშრალი ნიადაგი სჭირდება.
2. ასპარაგის გვიმრა - ამ ლამაზ მცენარეს უყვარს ჰაერი. უმჯობესია, თუ ოთახის ორივე მხრიდან მიეწოდება ჰაერი. ნებისმიერ თაროსა და მაგიდას დაამშვენებს პატარა ასპარაგის გვიმრა.
3. კალანხოე - მოათავსეთ ფანჯარასთან ახლოს და ნიადაგს ზედმეტად ნუ დაუსველებთ. სწორად მოვლის შემთხვევაში კალანხოე თქვენს ბინას ულამაზესი ყვავილებით დაამშვენებს.
4. ფოთოსი - ეს მცენარე გამოირჩევა იმით, რომ საფუძვლიანად ასუფთავებს ოთახში ჰაერს. შესანიშნავი არჩევანია როგორც სახლის ოფისისთვის ასევე მისაღები ოთახისთვის.
5. მარგალიტი - უნიკალური შესახედაობის დამსახურებით უფრო და უფრო პოპულარული ხდება ეს გამორჩეული მცენარე. მისი ჩამოკიდებული ფოთლები თვალისმომჭრელ დეკორაციას ქმნის. მოსავლელად ბევრი შუქი და ცოტა წყალია საჭირო.
6. ეჩევერია - სუკულენტების ერთ-ერთი ყველაზე პოპულარული სახეობაა. მცირე ზომის გამო ძალიან მარტივი მოსავლელია.
7. ბამბუკი - ეს პატარა მცენარე შეგიძლიათ გაზარდოთ ნიადაგშიც და წყალშიც. თუ წყალში გაზრდას გადაწყვეტთ აუცილებლად გამოუცვალეთ წყალი 7-10 დღეში ერთხელ, თუ ნიადაგს აირჩევთ არ დაგავიწყდეთ მისი აქტიურად მორწყვა.
8. ოქსალისი - თავისი გამორჩეული ფერის დამსახურებით თქვენი ბინის ულამაზესი დეკორაცია იქნება. მას ძალიან უყვარს სინათლე, სწორედ სინათლეში იწყებს აყვავებას.
პატარა მცენარეების მოვლის პრინციპები
ნებისმიერი მცენარე ხარობს იმ პირობებში, სადაც ბუნებრივად ჩნდება. მაგალითად, კაქტუსები უდაბნოს ცხელ დღეებში და ცივ ღამეებში, ბრომელიადები წვიმიანი ტყის ტენიანობაში, ხოლო გვიმრები გრილ, ნესტიან გარემოში ხარობენ. რა თქმა უნდა, ჩვენ ზუსტად იგივე პირობებს სახლში ვერ შევქმნით, მაგრამ თუ გვსურს მცენარეები სახლში გვქონდეს მიახლოებითი პირობების შექმნა უნდა ვცადოთ. წარმოგიდგენთ 4 პრინციპს, რომელიც ნებისმიერი მცენარის მოვლისას გასათვალისწინებელია:
- მორწყვა - როცა საქმე სახლის მცენარეების მორწყვას ეხება უნდა გვახსოვდეს, რომ თითოეული მცენარის ფესვებს წყალთან ერთად ჰაერი სჭირდება. ასე რომ, არ უნდა მოვრწყათ ზედმეტად (გარდა იმ მცენარეებისა, რომლებსაც მუდმივად სველი ნიადაგი უნდა ჰქონდეთ). წყლის საჭირო რაოდენობა, მორწყვის სიხშირე განისაზღვრება მცენარის ზომის, გარემოსა და წელიწადის დროის მიხედვით. მცენარე თქვენი რუტინის მიხედვით კი არა, საჭიროების მიხედვით მორწყეთ: მეტად გაზაფხულზე და ზაფხულში, ზამთარში კი ნაკლებად.
- კვება (ნუტრიენტები) - მცენარეებს გასაზრდელად სჭირდებათ აზოტი, ფოსფორი, კალიუმი, სხვადასხვა მიკროელემენტები და მინერალები. აზოტი ხელს უწყობს ფოთლებისა და ღეროების ზრდას, ფოსფორი - ფესვების ზრდას, კალიუმი - ყვავილობას და ნაყოფს. ბაღის მცენარეები ნიადაგიდან ბუნებრივად იღებენ ნუტრიენტებს, ხოლო ქოთნისებს საკვები უნდა მივაწოდოთ. მეტი სასუქია საჭირო, როცა ნელა იზრდება, ფოთლები უყვითლდება ან უფერმკრთალდება, ხოლო გადაჭარბებული კვების ნიშანია ჩამოცვენილი და დამწვარი ფოთლები, თეთრი ნალექი და ზაფხულში სუსტი ზრდა.
- ტენიანობა - მცენარეების უმრავლესობა, რომლებსაც სახლში ვზრდით (კაქტუსების და სუკულენტების გარდა) ტროპიკული რეგიონებიდან წარმოიშვა, ბუნებრივად მაღალ ტენიანობაში, ამიტომ, ზამთარში, როცა სახლს ვათბობთ მცენარეების გადასარჩენად ზომები უნდა მივიღოთ: გადავიტანოთ ისინი უფრო ნოტიო ადგილას (სამზარეულო ან აბაზანა), რეგულარულად დავასველოთ ფოთლები, მჭიდროდ დავალაგოთ მცენარეები ჯგუფებად.
- ფოთლების გასუფთავება - მტვერი აფერხებს შუქის შეღწევას მცენარის ფოთლების უჯრედებსა და ქლორპლასტებში, რამაც შეიძლება მცენარის სიკვდილი გამოიწვიოს. ამიტომ, ფოთლებს სისუფთავე უნდა შევუნარჩუნოთ: გამოიყენეთ რბილი ფუნჯი, გამოიყენეთ წყლის სპრეი და თუ საშუალება გაქვთ ზაფხულში ღია სივრცეში მოათავსეთ.
სახლის მცენარეების და მათ მოსავლელად საჭირო მასალის შეძენას არქი ქარდით პარტნიორ მაღაზიებში ფასდაკლებით შეძლებთ. ეს არის ბარათი, რომელიც არქიში ბინის შეძენისას საჩუქრად გადმოგეცემათ.